أيوة أنا يا جماعة شمام كله
في وقت رفضت السفر علشان بحب البلد دية
رفضت السفر في الوقت الي كان فيه كل سرسجي بيروح يسلك مجاري كام سنه في اوروبا بيرجع مليونير
ايوة انا كلجي
بتعب و عارف ان مافيش فايدة في اي حاجة و لسه مستمر في المحاولة
اتعلمت و عارف اني آخري كام ملطوش
اتعلمت بالاضافه للتعليم الحكومي علمت نفسي لغات و كومبيوتر و برضه مافيش فايده
بصحي انضف بيتي و محلي و شارعي و عارف ان كمان شوية هيجي شوية بهايم همج متخلفين و يرموا فيه ورق و مناديل و اكياس و مع ذلك مستمر في التنضيف زي ما يكون وظيفتي - بالاضافة لمحاولة اني اكل عيش- اني انضف ملحوظة انا بدفع للحكومة حاجة اسمها رسوم نضافة ما باخدش قصادها و لا حتي اكياس زبالة ارمي فيها
بصحي و عارف ان فيه ناس عايشين في مدن زي المحروقة باريس شوارعها بتترش عطور و مع كده بنزل ازعق للهمج المتخلفين الي بيروشوا عطورهم البيولوجية في الشارع علي اساس ان فيه فايدة مثلا
أيوة يا جماعه انا كلجي
كنت من الي بايعيين نفسهم للموت او الاسوأ التعذيب و بتكلم علي جرايم مبارك و المجرم بتاعه العادلي
فرحت جدا لما المجرم الحرامي القاتل محمد بن جسني بن مبارك اتخلع من زعامة عصابة مصر
و هللت زي اغلب شمامين الكله
ايوة انا زعلت و اتنرفزت و اتكلمت كتير جدا علي جرايم مرتزقة طنطاوي - عسكر طنطاوي - جيش الاحتلال الطنطاوي
ايوة انا من الناس الي اتكلموا باسمهم الحقيقي علي حفلات تعذيب المتحف المصري و كشوف العذرية و الاعتداء علي ديرين الانبا بيشوي و الانبا بولا و مذبحة المقطم و تدمير كنايس اطفيح و امبابة و عين شمس و طبعا مذبحة ماسبيرو
ايوة انا كلجي من الي قالوا لأ للتعديلات الدستورية و ما اهتمشتش اني اروح النار و اني ضد الاستقرار
ايوة انا شمام كله و شايف الخاين طنطاوي و مجلسه السمكري بيطبخ كل حاجة لصالح الاسلامنجاتية " اخوانجاتية و سلفنجاتية و جمعاتنجاتيه "
انا شمام كله و عارف ان مافيش فايدة عارف ان 77% هيوافقوا عليها علشان ينصروا الله و مجلسه السمكري و المرشد و خرفانه
عارف ان مجلس الشعب هيجي باغلبية قندهارية و مع ذلك برضه رحت ادليت بصوتي
ايوة انا شمام كله
و عصرت علي نفسي ليمون و انتخبت احمد شفيق مرتين علشان لقيته اقلهم سوءا
ايوة انا زعلت لما الخاين طنطاوي و مجلسه السمكري و لجنة انتخاباته زور الانتخابات لصالح الزفت مرسي
ايوة انا شمام كله و اعترضت علي غباء الاستبن فتحية بن العياط خليفة المسلمين في مصر المحروسه في عز قوته
ايوة اول ما لقيت فرصة لتنضيف مصر من الاحتلال الاخواني نزلت و هتفت و اتظاهرت
ايوة نزلت ووقفت مع كتير زي و في ايام كنت بنزل مع مواطنين كتير نقعد قدام مديرية الامن و مبني المحافظة علشان نساعد الشرطة و لو حتي باننا نعمل منظر حوالين الاماكن الحيوية دية
و كان ممكن فعلا ما ارجعش بس ما همنيش علشان شمام كله
ايوة انا شمام كله و عصرت علي نفسي لمون و صوت بنعم لدستور عارف انه ما بيجبش النعم و انه مش هيجيب استقرار
و برضه عصرت لمون و روحت و انتخبت السيسي لاني لقيته اقلهم سوءا
ايوة انا شمام كله و كلجي و بحلم بمصر نضيفه
بمصر حرة
بمصر عصرية و متطورة و مزدهرة سياسيا و اقتصاديا و اجتماعيا
بحلم بمصر الي ما بتدوسش ابناءها
بمصر الي بتعاقب كل مجرم
و بتكافئ كل حد بيعمل و يشتغل
و للأسف
الظاهر مافيش فايدة
ارجع للهلس تاني احسن
No comments:
Post a Comment