شوية هري

بخصوص الهري الي طالع حوالين الشباب الي رقصوا عريانين في العيد
1- في كل دول العالم امريكا و المانيا و غيرها عندهم حاجة اسمها فرق شوارع بيعزفوا ويغنوا و يرقصوا في الشوارع ده اولا حرية و من حقهم بضوابط قانونية و اكرر بضوابط قانونية
2- الي بيتهموا جيل الشباب بالتفاهة و بيهتفوا لدولة العواجيز بالحجة دية
ا- دولة مجرد جزء من الشباب للدقة من شباب العشوائيات و القري و ما شابه فيه شباب ذوقهم موسيقي كلاسيك يعني ارقي من خيال احلام دولة العواجيز
ب- دولة نتيجة لسياسة الدولة تجاهم من تجهيل و افقار و استبعاد و هجوم و تحقير و بلطجة من الشرطة ضدهم
ج- فيه دول مشابهة اهتمت بالتعليم و الثقافة و ما شابه مثلا الاتحاد السوفيتي السابق - مصر الخمسينات و الستينات - اغلب دول اوروبا و كتير من دول اسيا فكانت النتيجة مستوي راقي جدا لاحتفالات و تجمعات الشباب يعني ببساطة المواطن العادي في اغلب الدول دية بيقرا كتب نضيفة و يسمع موسيقي نضيفه و يتفرج علي فنون "رسم نحت - مسرح - موسيقي - نضيفة " و بيخرج يتفرج علي آثار بلده و عارف تاريخ بلده و حضارة بلده كويس
3- لما الاغاني المتاحة في السوق من نوعية المهرجانات و الموالد و الشعبي " الحالي ما اقصدش الشعبي بتاع كارم محمود و عبد العزيز محمود و ما شابه " و الافلام المتاحة في السوق كلها من نوعية الالماني و الاصلي و ما شابه كلها بتتكلم عن بلطجية بيغزوا بعض بالمطاوي طول الوقت طبيعي تكون دية النتيجة
4- لما مناهج التعليم بتمجد الحروب و الغزوات و النهب و السلب و الاغتصاب و الاستعباد و اقتناء الجواري طبيعي تكون دية النتيجة
5- لما اسلوب تعامل الحكومة مع الناس بيكون عنيف و مليان بلطجة و خروج عن القانون مثلا قصة جبل الطير يبقي طبيعي تكون النتيجة كده "بلطجة مضادة
6- لما تكون مجرد حتة ورقة صغيرة في اي مصلحة حكومية رحلة الي الجحيم لف و دوران و شاي بالياسمين و تفتيح مخ في حين بلاد كتيرة ممكن يخلصوا ورقهم عن طريق الانترنت طبيعي الشباب يهرب للبلطجة
7- لما تكون قدوة الشباب دولة شوية لعيبة كورة كل ثقافتهم اسامي لعيبة و اسامي اندية علي شوية ممثلين درجة عاشرة علي شوية مغنيين بيقولوا نفس اللحن بتكرار مملل مع تغيير شوية كلام فيه طبيعي تكون دية النتيجة
8- لما تكون نوعية الاكل و نوعية الشرب و نوعية السكن و نوعية المواصلات بالتدني ده طبيعي تكون دية النتيجة
9- لما يكون فيه اتجاه مجتمعي للقبح و القباحة زبالة شوارع تشويه المباني تشويه الاشخاص احتقار النساء احتقار الاختلاف احتقار الاقليات احتقار الاطفال و الضعيف طبيعي تكون دية النتيجة

يعني ببساطة كل الاسباب دية نتيجة دولة العواجيز الي بيخربوا علشان ما يبقي لهومش بديل
بقلم لورانس و وليم