ذكريات من ايام الخرفنة

مرة في خلوة خدام سألتهم سؤال عن اوشية " صلاة الراقدين" فيها حتة بتقول
"اذ ليس موت لعبيدك بل هو انتقال ((( اذ لبسوا جسدا و سكنوا في هذا العالم ))) ... "
اذ لبسوا جسدا تعبير معناه وجود مسبق يعني روح موجوده من الاول و دخلت " ركبت "لبست " اتحطت "اتحدت " او اي تعبير تحب تستعمله ب او في او مع الجسد الي اتخلق منفصل عنها معاها او قبلها او بعدها مش موضوعنا
يعني ببساطة دخلنا ازمة لاهوتية و عقيدية من ناحية الروح مولوده ولا مخلوقة خلق مباشر و من ناحية قصة وراثة الخطية الجدية و من ناحية تالته افكار غنوسية و فيثاغورسية و حتي بوذية و هندوسية و استجساد "تناسخ " و كلام كتير جداا
طبعا كلهم فتحوا بقهم و اتصدموا علشان اول مره يفكروا في الصلاة الي بتتصلي في كل رفع بخور عشية
وراح واحد منهم سأل الاسقف السؤال ده فحصل التالي
الاسقف ارتبك و قال انا ما فكرتش في الموضوع ده قبل كده بس الظاهر عندكم بدعة في موضوع الروح
و اتقفل الموضوع كسؤال
و في اول اجتماع الخدام بعد ما رجعنا من الخلوة كان فيه قمص شرير و مفتري "كاهن " مسك الخادم الي سأل السؤال ده هزأه علي الملأ و ادي له حرمان شهر و غالبا الي حصل بتعليمات و توجيهات الاسقف الي زعق له علي البدعة و الهرطقة
و طبعا مافيش اجابة لحد دلوقتي
الملاحظ الآتي
1- بطاركة و بابوات ومطارنة و اساقفة و قمامصه و قسوس و شمامسه و علمانيين كتييييييييير جداااا من وقت فرض اللغة الجربية و تعريب الصلوات القبطيه صلوا الاوشية دية و سمعوها كتير جدااا و ما حدش منهم دقق و فكر في المعني
2- السؤال اتسأل من سنين كتيرة و لسه ما حدش جاوب او حتي شغل دماغه انه يلاقي اجابه
3- هجوم و استنكار و تهزئ و حرمان "عقاب " بسبب مجرد سؤال بدون اجابة
4- استعمال كلمة بدعة و هرطقة و كان ناقص يعمل محكمة تفتيش و يولع في الي سأل السؤال بوصفه هرطوقي و بوصفنا في عصور وسطي
5- النتيجة النهائية " لا تجادل و لا تناقش يا أخ "ضع اسمك في الفراغ التالي "..............
:D
لورانس و وليم