شوية كلام جد

هو بس السؤال الوحيد الي بيطرح نفسه
هم قدموا ايه من افعال علي ارض الواقع علشان يفتكروا اللجنة دية او اللجنة التانية هيكون ليها تأثير ؟؟
يعني ببساطة كده اللجنة بالبابا الي تقريبا عايش في جنة المهجر الشمالية او الغربية بالاساقفة و القسس بكروشهم الضخمة و عربياتهم الفخمة
قدموا ايه عملي من تعاليم الانجيل مثلا مين فيهم راح زار جبل الطير علي ارض الواقع ولا مين فيهم راح زار الكشح ايام الكشح و الخصوص ايام الخصوص و العديسات و آلاف القري المهمشة المليانه غلابة متسابين للجهل و الفقر و التطرف
مش هاخش في مواضيع نظرية و فلسفية و علمية و لاهوتية و غيرها كتير
ببساطة فين تعاليم الانجيل الي بتنادوا بيه يا قداستك و يا نيافتك و يا قدسك
فين مثلا من له ثوبان فليعطي من ليس له " فما بالك بمن له عربيتان تلاته و فيلتين تلاته "
فين مثلا الكلام المبالغ فيه بتاع النسك و التقشف و احتمال الآلام و حمل الصليب و الحياة الرهبانية في وسط الرفاهية المبالغ فيها الي انتم عايشينها
فين مثلا " أتحبني ارع خرافي " في وسط الاهتمام بالاعداد و بالمهجر و برجال الاعمال و بما شابه
فين مثلا
:2 فانه ان دخل الى مجمعكم رجل بخواتم ذهب في لباس بهي و دخل ايضا فقير بلباس وسخ

2 :3 فنظرتم الى اللابس اللباس البهي و قلتم له اجلس انت هنا حسنا و قلتم للفقير قف انت هناك او اجلس هنا تحت موطئ قدمي

2 :4 فهل لا ترتابون في انفسكم و تصيرون قضاة افكار شريرة

قصاد الاراخنة الافاضل الي بيديروا الكنيسة اقتصاديا و سياسيا زي عم الحاج هاني عزيز مثلا و لا الجدع التاني الي رمي مراته في مستشفي مجانين و دفع رشوة لقمص ما فلف يخطب له بنفسه

ولا ال"فنانة " الشهيرة الي خلعت جوزها و اتطلقت و اتجوزت بعد تغيير مله " حسب تعبيرهم انكار الايمان و البابا شخصيا هو الي عمد ولادها و حسب كلامها هو الي وقف جنبها في محنتها

و فين كلام بولس الرسول الي قال اترتضوا ان تحاكموا امام الظالمين " القضاء الروماني و القوانين الرومانية " قصاد انكم بايعين ولادكم لصفقاتكم مع القتلة المجرمين مثلا الحضن الشهير بين البابا السابق و مجرم الحرب القاتل السفاح حمدي بدين
او اسقف نجع حمادي  لما غير اقواله  و برأ المجرم الغول و المجرم الكموني 
او الصفقات الانتخابية لصالح مبارك و لصالح غيره
او التطبيل لزفت الطين الاستبن مرسي و الخرفان 


فين لما بتوع مافيا المعجزات و تغييب العقل يضحك علي اصحاب الامراض الصعبة بحتة قطنة بزيت و هو لما يجي له دور برد يسافر يتعالج علي حساب المطرانية بتاعته الي فلوسها بيدفعها الغلابة و الفقرا دولة لفرنسا مرتين تلاته في سنة واحده زي دجال منيا القمح مثلا

و فين و فين و فين

عارف ان كتير من الخرفان مش هيعجبهم كلامي و هيبرروا و يدافعوا و الي هيعمل لي انفريند و بلوك

عموما ده رأي و الي عاوز يناقشه اهلا بيه و الي عاوز يدفن راسه في الرمل هو حر

بقلم لورانس و وليم