كلام هادي

بعد ما هدي الرغي حوالين الشاب الملحد الي اسمه اسماعيل
شوية كلام هادي موضوعي

هو اسماعيل عمل ايه و لا احرج مين
؟؟
الفيديو الي انا شوفته
حتي ما رضاش يدخل في موضوع الدين
هو طالع في البرنامج علشان يطالب بحقه في الوجود
بحقه في انه يعيش علي ارض هو مجبر زي ملايين المصريين الي مش قادرين يخرجوا منها "مسيحيين - مسلمين - بهائيين - اي انواع اخري من الكفار الموجودين مكانيا و غير موجودين في واقع الحياة الا طبعا علي سبيل نور عيون السيسي "

المذيعة و المعدين و المخرج و الضيوف و المتصلين ببساطة كانوا عاوزين يوقعوه
يا اما يتكلم في الدين و يعملوا له ازدراء اديان و الي احضان الشاويش بسطويسي رضي الله عنه و ارضاه
او يبان مجنون و الحاده يبقي مشكلة نفسية و برضه الي احضان التمرجي بسطاويسي رضي الله عنه و ارضاه
او يستلمه الشيخ بسطاويسي رضي الله عنه و ارضاه و يستتاب ثلاثة ايام ثم يقتل و يسلم الي الحانوتي بسطاويسي رضي الله عنه و ارضاه
و بكده تنتهي المشكلة و يستمر المجتمع المؤمن بقوة الدستور و القانون و الشيخ بسطاويسي و العسكور بسطاويسي و الدكتور النفسي بسطاويسي و المستشار بسطاويسي

هي دية القصة ببساطة
شاويش كبير جدااا اسمه المجتمع بسطاويسي
مش عاوز لا يتناقش و لا يفهم و لا يٍفّهٍم ولا يقبل و لا يتقبل و لا يغير ولا يتغير

تفتكروا اسماعيل او غيره عنده اختيارات ايه غير
1- ينافق المجتمع و يعمل نفسه مؤمن بشئ المجتمع رافض حتي مجرد يسمع اسئلته
2- يهاجر لو عنده خرم ابرة يهرب منه
3- يصطدم مع المجتمع و ينتهي في احضان احد الثلاثة بسطاويسات "الشاويش - التمرجي - الحانوتي "

ببساطة احنا مجتمع غبي محتاج علاج
ايه المشكلة ان الانسان ده يعيش حياته كانسان بكل حقوق مواطنته
عندك مشكلة مع اعتقادة الفكري - الفلسفي - الديني - السياسي - الكروي - الفني -الجنسي - ذوقه في الاكل
بسيطة روح اقعد معاه و اتناقش معاه
اكتب عن افكاره مقاله او كتاب و بيع و اكسب
شايفه روح ضاله و هتخش النار انقذها و اهديه و رجعه للايمان الي انت شايفه صح
بالكلام بالنقاش بالاقناع

لكن الاجبار عمره ما هيكون سبب ايمان
ولا التهديد بالحبس زي ما الظبوط الي اتصل بيه ما عمل
ولا المستثار - مافيش خطأ املائي هنا - ما هدده بالقانون
ما ياما منافقين في كل التيارات و الاديان و المعتقدات
الارهاب الفكري الي بيتطبق عليه عمره ما كان الحل

بالعكس هو السبب في مشاكل و مصايب مجتمعنا


ببساطة الحل هو الشفافية هو الحرية
هو السموات المفتوحة و الابواب المفتوحة و العقول المفتوحة
و الاهم القلوب المفتوحة

فزمن السيف او الجزية انتهي
زمن الغزوات و النهبات انتهي في كل العالم
الا من الشر الاوسخ التعيس