copttux
Ⲟⲩⲣⲉⲙⲛ̀Ⲭⲏⲙⲓ
Search This Blog
Sunday, March 16, 2025
Saturday, March 15, 2025
الذئب في الطريق
Friday, March 14, 2025
Sunday, March 2, 2025
Friday, February 21, 2025
Ϯⲡ̀ⲣⲟⲫⲏⲧⲓⲁ ⲛ̀ⲧⲉ Ⲓⲱⲛⲁ ⲃ̅
2
(ⲁ︦) ⲟⲩⲟϩ ⲁϥⲟⲩⲁϩⲥⲁϩⲛⲓ ⲛ̀ϫⲉ ⲡϭ̅ⲥ̅ ⲛ̀ⲟⲩⲛⲓϣϯ ⲛ̀ⲕⲩⲧⲟⲥ ⲉ̀ⲑⲣⲉϥⲱⲙⲕ ⲛ̀ⲓⲱⲛⲁ ⲟⲩⲟϩ ⲛⲁⲣⲉ ⲓⲱⲛⲁ ϧⲉⲛ ⲑⲛⲉϫⲓ ⲙ̀ⲡⲓⲕⲩⲧⲟⲥ ⲛ̀ⲅ̅ ⲛ̀ⲉϩⲟⲟⲩ ⲛⲉⲙ ⲅ̅ ⲛ̀ⲉϫⲱⲣϩ
(ⲃ︦) ⲟⲩⲟϩ ⲁϥⲉⲣⲡⲣⲟⲥⲉⲩⲭⲉⲥⲑⲉ ⲛ̀ϫⲉ ⲓⲱⲛⲁ ϩⲁ ⲡϭ̅ⲥ̅ ⲡⲉϥⲛⲟⲩϯ ⲉ̀ⲃⲟⲗ ϧⲉⲛ ⲑⲛⲉϫⲓ ⲙ̀ⲡⲓⲕⲩⲧⲟⲥ ⲟⲩⲟϩ ⲡⲉϫⲁϥ
(ⲅ︦) ⲁⲓⲱϣ ⲉ̀ⲃⲟⲗ ϧⲉⲛ ⲡⲁϩⲟϫϩⲉϫ ⲟⲩⲃⲉ ⲡϭ̅ⲥ̅ ⲡⲁⲛⲟⲩϯ ⲟⲩⲟϩ ⲁϥⲥⲱⲧⲉⲙ ⲉ̀ⲣⲟⲓ ⲉ̀ⲃⲟⲗ ϧⲉⲛ ⲑⲛⲉϫⲓ ⲛ̀ⲁⲙⲉⲛϯ ⲁⲕⲥⲱⲧⲉⲙ ⲉ̀ⲧⲁⲥⲙⲏ
(ⲇ︦) ⲁⲕⲃⲉⲣⲃⲱⲣⲧ ⲉ̀ⲛⲓϣⲱⲕ ⲛ̀ⲧⲉ ⲡϩⲏⲧ ⲛ̀ⲧⲉ ⲫⲓⲟⲙ ⲟⲩⲟϩ ⲁⲩⲕⲱϯ ⲉ̀ⲣⲟⲓ ⲛ̀ϫⲉ ϩⲁⲛⲓⲁⲣⲱⲟⲩ ⲛⲉⲕⲣⲱⲟⲩϣ ⲧⲏⲣⲟⲩ ⲛⲉⲙ ⲛⲉⲕϫⲟⲗ ⲁⲩⲓ̀ ⲉ̀ϩⲣⲏⲓ ⲉ̀ϫⲱⲓ
(ⲉ︦) ⲟⲩⲟϩ ⲁ̀ⲛⲟⲕ ⲁⲓϫⲟⲥ ϫⲉ ⲁⲩϩⲓⲧ ⲥⲁⲃⲟⲗ ⲛ̀ⲛⲉⲕⲃⲁⲗ ϩⲁⲣⲁ ϯⲛⲁⲟⲩⲁϩⲧⲟⲧ ⲉ̀ⲑⲣⲓϫⲟⲩϣⲧ ⲉ̀ϫⲉⲛ ⲡⲉⲕⲉⲣⲫⲉⲓ ⲉⲑⲟⲩⲁⲃ
(ⲋ︦) ⲁϥϫⲱϣ ⲉ̀ϩⲣⲏⲓ ⲉ̀ϫⲱⲓ ⲛ̀ϫⲉ ⲟⲩⲙⲱⲟⲩ ϣⲁ ⲧⲁⲯⲩⲭⲏ ⲁϥϩⲱⲃⲥⲧ ⲛ̀ϫⲉ ⲟⲩⲛⲟⲩⲛ ⲛ̀ϧⲁⲓⲉ̀ ⲁⲥⲱⲙⲥ ⲛ̀ϫⲉ ⲧⲁⲁ̀ⲫⲉ
(ⲍ︦) ϧⲉⲛ ϩⲁⲛⲫⲱϫⲓ ⲛ̀ⲧⲉ ϩⲁⲛⲧⲱⲟⲩ ⲁⲓϣⲉ ⲛⲏⲓ ⲉ̀ϧⲣⲏⲓ ⲉ̀ⲟⲩⲕⲁϩⲓ ⲫⲏ ⲉⲧⲉ ⲛⲉϥⲙⲟⲭⲗⲟⲥ ⲁ̀ⲙⲟⲛⲓ ϣⲁ ⲉⲛⲉϩ ⲟⲩⲟϩ ⲙⲁⲣⲉϥⲓ̀ ⲉ̀ⲡϣⲱⲓ ⲛ̀ϫⲉ ⲡⲧⲁⲕⲟ ⲛ̀ⲧⲉ ⲡⲁⲱⲛϧ ⲡϭ̅ⲥ̅ ⲫϯ
(ⲏ︦) ϧⲉⲛ ⲡϫⲓⲛⲑⲣⲉⲥⲙⲟⲩⲛⲕ ⲛ̀ϫⲉ ⲧⲁⲯⲩⲭⲏ ⲉ̀ⲃⲟⲗ ϩⲁⲣⲟⲓ ⲁⲓⲉⲣⲫⲙⲉⲩⲓ ⲙ̀ⲫⲛⲁⲓ ⲙ̀ⲡϭ̅ⲥ̅ ⲙⲁⲣⲉⲥⲓ̀ ⲛ̀ϫⲉ ⲧⲁⲡⲣⲟⲥⲉⲩⲭⲏ ⲉ̀ⲡϣⲱⲓ ϩⲁⲣⲟⲕ ⲉ̀ⲡⲉⲕⲉⲣⲫⲉⲓ ⲉⲑⲟⲩⲁⲃ
(ⲑ︦) ⲛⲏ ⲉⲧⲁⲣⲉϩ ⲉ̀ⲛⲓⲙⲉⲧⲉⲫⲗⲏⲟⲩ ⲛⲉⲙ ⲛⲓⲙⲉⲑⲛⲟⲩϫ ⲁⲩⲭⲱ ⲛ̀ⲥⲱⲟⲩ ⲙ̀ⲡⲟⲩⲛⲁⲓ
(ⲓ︦) ⲁ̀ⲛⲟⲕ ⲇⲉ ϧⲉⲛ ⲟⲩⲥⲙⲏ ⲛ̀ⲧⲉ ⲟⲩⲧⲱⲃϩ ⲛⲉⲙ ⲟⲩⲟⲩⲱⲛϩ ⲉ̀ⲃⲟⲗ ϯⲛⲁϣⲱⲧ ⲛⲁⲕ ⲛⲏ ⲉⲧⲁⲓⲱϣ ⲙ̀ⲙⲱⲟⲩ ϯⲛⲁⲧⲏⲓⲧⲟⲩ ⲛⲁⲕ ⲡϭ̅ⲥ̅ ⲛ̀ⲧⲉ ⲡⲁⲟⲩϫⲁⲓ
(ⲓ︦ⲁ︦) ⲟⲩⲟϩ ⲁϥⲟⲩⲁϩⲥⲁϩⲛⲓ ⲙ̀ⲡⲓⲕⲩⲧⲟⲥ ⲁϥϩⲓⲟⲩⲓ̀ ⲛ̀ⲓⲱⲛⲁ ⲉ̀ⲡⲉⲧϣⲟⲩⲱ̀ⲟⲩ
Sunday, February 16, 2025
شئ في قلبي
Friday, January 31, 2025
Monday, January 27, 2025
Sunday, January 5, 2025
ϯⲥ́ϩⲓⲙⲓ ⲛ́ⲡⲟⲣⲛⲏ
Thursday, December 26, 2024
Ⲁⲕⲓ́ ⲉ́ⲡ́ϧⲟⲗϧⲉⲗ
Sunday, December 22, 2024
Ⲥⲱⲧⲉⲙ ⲱ ⲛⲁⲙⲉⲛⲣⲁϯ
ⲟⲩⲮⲁⲗⲓⲁ̀ ⲉ̀ⲑⲃⲉ
ϯⲁⲅⲓⲁ̀ Ⲙⲁⲣⲓⲁ̀
ϧⲉⲛ Ⲭⲟⲓⲁⲕ ⲛⲉⲙ ⲛⲉⲥϣⲁⲓ ϩⲓϫⲉⲛ
ⲍ̅ ⲛ̀ⲥⲱⲃ
⁘ Ⲥⲱⲧⲉⲙ ⲱ ⲛⲁⲙⲉⲛⲣⲁϯ : ⲁⲣⲓⲛⲟⲓⲛ ⲕⲁⲗⲱⲥ :ⲁⲛⲁⲩ ⲟⲩⲟϩ ⲕⲁϯ : ⲉ̀ⲡ̀ⲥⲁϫⲓ ⲙ̀ⲡⲓϩⲩⲙⲛⲟⲇⲟⲥ .
Ⲇⲁⲩⲓⲇ ⲡⲓⲡ̀ⲣⲟⲫⲏⲧⲏⲥ ⲡⲓⲗⲉⲃⲅ̀ⲣⲁⲫⲟⲥ :ⲡⲓⲉⲣⲟⲯⲁⲗⲧⲏⲥ:ⲁϥϫⲟⲥ ϧⲉⲛ ⲡⲓⲯⲁⲗⲙⲟⲥ.
⁙ Ϫⲉ ϯⲛⲁⲥ̀ⲙⲟⲩ ⲉ̀Ⲡϭ̅ⲥ̅ :ⲛ̀ⲥⲏⲟⲩ ⲛⲓⲃⲉⲛ ⲛ̀ⲥⲏⲟⲩ ⲛⲓⲃⲉⲛ : ϧⲉⲛ ⲟⲩⲛⲓϣϯ ⲛ̀ϣ̀ⲣⲱⲓⲥ : ⲛⲉⲙ ⲙⲉⲧⲣⲉⲙⲣⲁⲩϣ ⲛⲓⲃⲉⲛ .
Ϩⲱⲥ ϩⲁⲛϩⲟⲗϫ ⲉ̀ⲙⲁϣⲱ : ⲛⲉ ⲛⲉⲕⲥ̀ⲃⲱⲟⲩⲓ̀ :ϧⲉⲛ ⲧⲁϣ̀ⲃⲱⲃⲓ ⲉ̀ϩⲱⲧⲉ ⲡⲓⲉ̀ⲃⲓⲱ̀ :ⲛⲉⲙ ⲡⲓⲙⲟⲗϩ ⲙ̀ⲡⲓⲛⲏⲓⲛⲓ .
⁘ Ϫⲉⲙϯⲡⲓ ⲁⲛⲁⲩ :ϫⲉ ⲟⲩϩⲉⲗϫⲉ ⲡⲉ Ⲡϭ̅ⲥ̅ :ⲱⲟⲩⲛⲓⲁⲧϥ ⲙ̀ⲫⲏⲉ̀ⲧⲉⲙ̀ⲙⲁⲩ :ⲉⲧⲉⲣϩⲉⲗⲡⲓⲥ ⲉ̀ⲣⲟϥ .
ⲥ̀ϭⲟⲥⲓ ⲉ̀ⲙⲁϣⲱ : ⲛ̀ϫⲉ ⲡⲁⲓϩⲱⲃ ⲛ̀ϣ̀ⲫⲏⲣⲓ : ⲛ̀ⲧⲉ ⲡⲓⲬ̅̅Ⲥ̅ ⲡ̀ⲟⲩⲣⲟ :ⲫⲏⲉⲧⲁϥⲉⲣⲣⲱⲙⲓ .
⁙ Ⲉ̀ⲃⲟⲗ ϧⲉⲛ Ⲙⲁⲣⲓ̈ⲁ̀ :ⲑ̀ⲙⲁⲩ ⲙ̀ⲡⲓⲧⲟⲩⲃⲟ :ⲑⲁϯⲡⲁⲣⲑⲉⲛⲓⲁ̀:ⲉⲧϫⲟⲗϩ ⲙ̀ⲡⲓⲧⲁⲓⲟ.
Ⲙⲁⲣⲉⲛ ϩⲱⲥ ⲉ̀ⲣⲟϥ : ⲧⲉⲛϭⲓⲥⲓ ⲙ̀ⲡⲉϥⲣⲁⲛ :ⲟⲩⲟϩ ⲧⲉⲛⲟⲩⲱϣⲧ ⲙ̀ⲙⲟϥ : ϫⲉ ⲁϥⲉⲣⲟⲩⲛⲁⲓ ⲛⲉⲙⲁⲛ.
⁘ Ⲟⲩⲟϩ ⲛ̀ⲧⲉⲛⲧⲁⲓⲟ : ⲛ̀ϯⲡⲁⲣⲑⲉⲛⲟⲥ : ⲛ̀ϩⲟⲩⲟ̀ ⲇⲉ ⲛ̀ϩⲟⲩⲟ̀ : ⲡⲉⲥⲭⲉⲣⲉⲧⲓⲥⲙⲟⲥ .
ϧⲉⲛ ϩⲁⲛ ⲉⲩⲫⲟⲙⲓⲁ̀ : ⲉⲑⲃⲉ ⲑⲏⲉ̅ⲑ̅ⲩ̅ : ϫⲉ ⲣⲁϣⲓ ⲱ Ⲙⲁⲣⲓⲁ̀ :ϧⲉⲛ ⲟⲩⲣⲁϣⲓ ⲉϥⲟⲩⲟⲁⲃ .
⁙ Ⲣⲁϣⲓ ⲱ Ⲙⲁⲣⲓ̈ⲁ̀ : ϯⲥⲱⲧⲡ ⲛ̀ⲧⲉ Ⲫ̀ⲓⲱⲧ : ⲣⲁϣⲓ ⲱ Ⲙⲁⲣⲓⲁ̀ :ϯⲡ̀ⲣⲟⲥⲧⲁⲧⲏⲥ ⲉ̀ⲧⲉⲛϩⲟⲧ .
Ⲣⲁϣⲓ ⲱ Ⲙⲁⲣⲓⲁ̀ : ⲡⲓⲑ̀ⲣⲟⲛⲟⲥ ⲙ̀ⲡⲓϣⲏⲣⲓ : Ⲣⲁϣⲓ ⲱ Ⲙⲁⲣⲓⲁ̀ :ϯϩ̀ⲣⲏⲣⲓ ⲉⲧⲁϥⲫⲓⲣⲓ .
⁘ Ⲣⲁϣⲓ ⲱ Ⲙⲁⲣⲓⲁ̀ : ⲫ̀ⲙⲁⲛ̀ϣⲱⲡⲓ ⲙ̀ⲡⲓⲠ̀ⲛⲉⲩⲙⲁ ⲉ̅ⲑ̅ⲩ : Ⲣⲁϣⲓ ⲱ Ⲙⲁⲣⲓⲁ̀ : ⲑ̀ⲙⲁⲩ ⲙ̀ⲫⲏⲉ̅ⲑ̅ⲩ .
Ⲣⲁϣⲓ ⲱ Ⲙⲁⲣⲓⲁ̀ :ⲡ̀ϩⲁⲣⲙⲁ ⲛ̀ⲛⲓⲬⲉⲣⲟⲃⲓⲙ : Ⲣⲁϣⲓ ⲱ Ⲙⲁⲣⲓⲁ̀ :ϯⲡⲉⲧⲣⲁ ⲛ̀ⲁⲧⲕⲓⲙ .
⁘ Ⲣⲁϣⲓ ⲱ Ⲙⲁⲣⲓⲁ : ⲡ̀ⲧⲉⲛϩ ⲛ̀ⲛⲓⲤⲉⲣⲁⲫⲓⲙ : Ⲣⲁϣⲓ ⲱ Ⲙⲁⲣⲓⲁ̀ ⲧ̀ϣⲉⲣⲓ ⲛ̀Ⲓⲱⲁⲕⲓⲙ .
Ⲣⲁϣⲓ ⲱ Ⲙⲁⲣⲓⲁ̀ : ⲧ̀ϣⲟⲩⲣⲏ ⲛ̀ⲛⲓⲡ̀ⲣⲉⲥⲃⲩⲧⲉⲣⲟⲥ : Ⲣⲁϣⲓ ⲱ Ⲙⲁⲣⲓⲁ̀ ⲫ̀ⲣⲁϣⲓ ⲛ̀ⲛⲓⲁⲅⲅⲉⲗⲟⲥ .
⁙ Ⲣⲁϣⲓ ⲱ Ⲙⲁⲣⲓⲁ : ⲑ̀ⲙⲉⲧⲓⲱⲧ ⲙ̀Ⲡⲉⲧⲣⲟⲥ : Ⲣⲁϣⲓ ⲱ Ⲙⲁⲣⲓⲁ̀ : ⲧ̀ⲥⲟⲫⲓⲁ̀ ⲙ̀Ⲡⲁⲩⲗⲟⲥ .
Ⲣⲁϣⲓ ⲱ Ⲙⲁⲣⲓⲁ̀ : ⲧ̀ϫⲟⲙ ⲛ̀Ⲁⲛⲁⲇⲣⲉⲁⲥ : Ⲣⲁϣⲓ ⲱ Ⲙⲁⲣⲓⲁ̀ : ⲑ̀ⲙⲁⲩ ⲙ̀Ⲙⲁⲥⲓⲁⲥ .
⁘ Ⲣⲁϣⲓ ⲱ Ⲙⲁⲣⲓⲁ̀ : ⲧ̀ⲡⲁⲣⲑⲉⲛⲓⲁ̀ ⲛ̀Ⲓⲱⲁⲛⲛⲏⲥ :Ⲣⲁϣⲓ ⲱ Ⲙⲁⲣⲓⲁ̀ ⲡ̀ⲧⲟⲩⲃⲟ ⲛ̀Ⲓⲁⲕⲱⲃⲟⲥ .
Ⲣⲁϣⲓ ⲱ Ⲙⲁⲣⲓⲁ̀ : ⲡ̀ⲟⲩⲛⲟϥ ⲙ̀Ⲫⲓⲗⲓⲡⲡⲟⲥ : Ⲣⲁϣⲓ ⲱ Ⲙⲁⲣⲓⲁ̀ ⲡ̀ⲟⲩϫⲁⲓ ⲙ̀Ⲙⲁⲧⲑⲉⲟⲥ .
⁙ Ⲣⲁϣⲓ ⲱ Ⲙⲁⲣⲓⲁ̀ : ⲡ̀ⲗⲁⲥ ⲙ̀Ⲃⲁⲣⲑⲟⲗⲟⲙⲉⲟⲥ : Ⲣⲁϣⲓ ⲱ Ⲙⲁⲣⲓⲁ̀ :ⲫ̀ⲛⲁϩϯ ⲛ̀Ⲑⲱⲙⲁⲥ .
Ⲣⲁϣⲓ ⲱ Ⲙⲁⲣⲓⲁ̀ : ⲡ̀ⲭⲟϩ ⲛⲤⲓⲙⲉⲱⲛ : Ⲣⲁϣⲓ ⲱ Ⲙⲁⲣⲓⲁ̀ : ⲫ̀ⲛⲱϩⲉⲙ ⲙ̀Ⲙⲁⲣⲕⲟⲥ .
⁘ Ⲣⲁϣⲓ ⲱ Ⲙⲁⲣⲓⲁ̀ : ⲡ̀ⲧⲁϫⲣⲟ ⲙ̀Ⲙⲁⲧⲑⲓⲁⲥ : Ⲣⲁϣⲓ ⲱ Ⲙⲁⲣⲓⲁ :ⲡ̀ⲧⲁⲗϭⲟ ⲛ̀Ⲗⲟⲕⲁⲥ .
Ⲣⲁϣⲓ ⲱ Ⲙⲁⲣⲓⲁ̀ : ⲡ̀ⲧⲁⲓⲟ ⲛ̀ⲛⲓⲡⲁⲧⲣⲓⲁⲣⲭⲏⲥ : Ⲣⲁϣⲓ ⲱ Ⲙⲁⲣⲓⲁ̀ : ⲡ̀ϩⲓⲱⲓϣ ⲛ̀ⲛⲓⲡ̀ⲣⲟⲫⲏⲧⲏⲥ .
⁙ Ⲣⲁϣⲓ ⲱ Ⲙⲁⲣⲓⲁ̀ : ⲡ̀ϣⲟⲩϣⲟⲩ ⲛ̀ⲛⲓⲙⲁⲑⲏⲧⲏⲥ : Ⲣⲁϣⲓ ⲱ Ⲙⲁⲣⲓⲁ : ⲑ̀ⲙⲁⲩ ⲙ̀ⲡⲓⲆⲉⲥⲡⲟⲧⲏⲥ .
Ⲣⲁϣⲓ ⲱ Ⲙⲁⲣⲓⲁ̀ :ⲡⲓⲭ̀ⲗⲟⲙ ⲛ̀ⲛⲓ⳥ : Ⲣⲁϣⲓ ⲱ Ⲙⲁⲣⲓⲁ̀ : ⲡ̀ⲑⲉⲗⲏⲗ ⲛ̀ⲛⲓⲇⲓⲕⲉⲟⲥ .
⁘ Ⲣⲁϣⲓ ⲱ Ⲙⲁⲣⲓⲁ̀ : ⲧ̀ϩⲉⲃⲥⲱ ⲛ̀ⲛⲓⲥ̀ⲧⲁⲩⲣⲟⲫⲟⲣⲟⲥ : Ⲣⲁϣⲓ ⲱ Ⲙⲁⲣⲓⲁ :ⲡ̀ⲧⲟⲩⲃⲟ ⲛ̀ⲛⲓⲡⲁⲣⲑⲉⲛⲟⲥ .
Ⲣⲁϣⲓ ⲱ Ⲙⲁⲣⲓⲁ̀ :ϯⲁⲅⲛⲓⲁ̀ ⲛ̀ⲛⲓⲁⲥⲕⲩⲧⲏⲥ : Ⲣⲁϣⲓ ⲱ Ⲙⲁⲣⲓⲁ̀ : ⲣⲱϥ ⲛ̀ⲛⲓⲟⲙⲟⲗⲅⲓⲥⲧⲏⲥ .
⁙ Ⲣⲁϣⲓ ⲱ Ⲙⲁⲣⲓⲁ̀ :ⲡⲓⲭ̀ⲗⲟⲙ ⲛ̀ⲧⲉ ⲡⲉⲛϣⲟⲩϣⲟⲩ : Ⲣⲁϣⲓ ⲱ Ⲙⲁⲣⲓⲁ̀ :ⲑ̀ⲙⲁⲩ ⲛ̀ⲛⲓⲉⲧⲟⲛϧ ⲧⲏⲣⲟⲩ .
Ⲣⲁϣⲓ ⲱ Ⲙⲁⲣⲓⲁ̀ : ⲧ̀ⲁⲡⲁⲣⲭⲏ ⲙ̀ⲡⲉⲛⲥⲱϯ : Ⲣⲁϣⲓ ⲱ Ⲙⲁⲣⲓⲁ̀ : ⲑ̀ⲙⲁⲩ ⲙ̀ⲡⲉⲛⲛⲟⲩϯ .
⁘ Ⲣⲁϣⲓ ⲱ Ⲙⲁⲣⲓⲁ̀ : ⲡ̀ⲧⲁϫⲣⲟ ⲙ̀ⲡⲉⲛⲧⲟⲩⲃⲟ : Ⲣⲁϣⲓ ⲱ Ⲙⲁⲣⲓⲁ̀ : ⲑ̀ⲙⲁⲩ ⲙ̀ⲡⲓⲟⲩⲣⲟ .
Ⲣⲁϣⲓ ⲱ Ⲙⲁⲣⲓⲁ̀ : ϯϭⲣⲟⲙⲡⲓ ⲉⲑⲛⲉⲥⲱⲥ : Ⲣⲁϣⲓ ⲱ Ⲙⲁⲣⲓⲁ̀ : ⲑ̀ⲙⲁⲩ ⲛⲒⲏ̅ⲥ̅ ⲠⲬ̅Ⲥ̅ .
⁙ Ⲣⲁϣⲓ ⲱ Ⲙⲁⲣⲓⲁ̀ :ⲡ̀ϣⲟⲩϣⲟⲩ ⲙ̀ⲡⲉⲛⲅⲉⲛⲟⲥ : Ⲣⲁϣⲓ ⲱ Ⲙⲁⲣⲓⲁ̀ : ⲟⲩⲟϩ ϯⲡ̀ⲣⲟⲥⲧⲁⲧⲏⲥ : ⲛ̀ⲧⲉ ⲛⲓⲡⲓⲥⲧⲟⲥ .
Ⲁⲣⲓⲡ̀ⲣⲉⲥⲃⲉⲩⲓⲛ ⲉ̀ϫⲱⲛ :ⲛⲁϩⲣⲉⲛ ⲫⲏⲉⲧⲁϥⲑⲁⲙⲓⲟⲛ : ϩⲟⲡⲱⲥ ⲛ̀ⲧⲉϥⲧⲁϫⲣⲟⲛ : ϧⲉⲛ ⲡⲓⲛⲁϩϯ ⲉⲧⲥⲟⲩⲧⲱⲛ .
⁘ Ⲛ̀ⲧⲉϥ ⲁⲣⲓϩ̀ⲙⲟⲧ ⲛⲁⲛ : ⲙ̀ⲡ̀ⲱⲛϧ ⲙ̀ⲡⲉⲛⲓⲱⲧ : Ⲡⲁⲡⲁ ⲁⲃⲃⲁ (ⲛⲓⲙ) : ⲡⲓⲙⲁⲛ̀ⲉ̀ⲥⲱⲟⲩ ⲉ̀ⲧⲉⲛϩⲟⲧ .
Ⲡⲁⲓⲣⲏϯ ⲡⲉϥϣ̀ⲫⲏⲣ : ⲛ̀ⲗⲩⲧⲟⲣⲅⲟⲥ ⲛ̀ⲁⲛⲟⲩϯ : ⲡⲉⲛⲓⲱⲧ (ⲙ̀ⲙⲉⲧⲣⲟⲡⲟⲗⲓⲧⲏⲥ ,ⲓⲉ , ⲛ̀ⲉ̀ⲡⲓⲥⲕⲟⲡⲟⲥ ) : ⲁⲃⲃⲁ (ⲛⲓⲙ) .
Ⲡⲁⲓⲣⲏϯ ⲛⲟⲩϣ̀ⲫⲏⲣ : ⲛ̀ⲗⲩⲧⲟⲣⲅⲟⲥ ⲛ̀ⲁⲛⲟⲩϯ : ⲛⲉⲛⲓⲱϯ ⲙ̀ⲙⲉⲧⲣⲟⲡⲟⲗⲓⲧⲏⲥ : ⲛⲉⲙ ⲛⲓⲉ̀ⲡⲓⲥⲕⲟⲡⲟⲥ
⁙ Ⲉ̀ⲑⲣⲟⲩⲁⲙⲟⲛⲓ ⲙ̀ⲙⲟⲛ : ϧⲉⲛ ⲡⲓⲙⲁ ⲙ̀ⲙⲟⲛⲓ : ⲙ̀ⲃⲁⲥⲓⲗⲓⲕⲟⲛ : ⲉⲥⲑⲱⲛ ⲛ̀ϩⲏⲣⲏⲛⲓ .
Ⲛⲉⲙ ⲛⲓϩⲩⲅⲟⲩⲙⲉⲛⲟⲥ : ⲛⲉⲙ ⲛⲓⲡ̀ⲣⲉⲥⲃⲩⲧⲉⲣⲟⲥ : ⲛⲉⲙ ⲛⲓⲇⲓⲁⲕⲱⲛⲟⲥ : ⲛⲉⲙ ⲛⲓⲗⲁⲓ̈ⲕⲟⲥ .
⁘ Ⲛⲉⲙ ⲛⲓⲙⲟⲛⲁⲭⲟⲥ :ⲉⲧϣⲱⲡ ϩⲓ ⲡ̀ϣⲁϥⲉ : ⲛ̀ⲧⲉⲛϭⲓⲙⲉⲣⲟⲥ :ⲛⲉⲙ ⲡⲓϩ̀ⲙⲟⲧ ⲛ̀ⲧⲉ ⲧ̀ⲫⲉ .
Ⲥⲉ ⲟⲛⲧⲱⲥ ⲧⲉⲛ ϯⲱⲟⲩ : ⲛ̀Ⲓⲏ̅ⲥ̅ ⲠⲬ̅Ⲥ̅ : ⲧⲉⲛⲭⲉⲣⲉⲧⲓⲥⲙⲟⲥ ⲑⲏⲉⲑⲙⲉϩ ⲛ̀ⲱⲟⲩ : Ⲙⲁⲣⲓⲁ̀ ϯⲡⲁⲣⲑⲉⲛⲟⲥ .
https://www.academia.edu/126505097/%E2%B2%A4%E2%B2%B1%E2%B2%A7%E2%B2%89%E2%B2%99_%E2%B2%B1_%E2%B2%9B%E2%B2%81%E2%B2%99%E2%B2%89%E2%B2%9B%E2%B2%A3%E2%B2%81%CF%AF?source=swp_share