ϮⲮⲁⲗⲓⲁ ⲛ̀Ⲁⲇⲁⲙ ⲉⲑⲃⲉ ϯⲔⲩⲣⲓⲁⲕⲏ (Ⲁⲓⲛⲁϩϯ

 

 

 

ⲁ ⲠⲆϤ ⲛ̀Ⲁⲕⲁⲇⲉⲙⲓⲁ.ⲉⲇⲩ

Ⲁⲓⲛⲁϩϯ ⲉⲑⲃⲉ ⲫⲁⲓ : ⲁⲓⲥⲁϫⲓ ϧⲉⲛ ⲟⲩϫⲟⲙ :

ⲉⲑⲃⲉ ⲡⲉⲕⲛⲓϣϯ ⲛ̀ⲛⲁⲓ : Ⲡ̀ϭ̅ⲥ̅ ⲛ̀ⲧⲉ ⲛⲓϫⲟⲙ .

Ⲃⲟⲩⲏⲑⲓⲛ ⲉ̀ⲣⲟⲓ ⲡⲁϭⲟⲓⲥ : Ⲓⲏ̅ⲥ̅ ⲡⲓⲣⲉϥϣⲉⲛϩⲏⲧ :

ⲉⲑⲣⲉϯⲱⲟⲩ ⲛ̀ⲧⲁϭ̅ⲥ̅ : ⲧⲉⲕⲙⲁⲩ ⲛ̀ϣⲉⲗⲉⲧ .

⳽ Ϫⲉ (ⲅⲉ) ⲅⲁⲣ ⲁⲗⲏⲑⲱⲥ : ⲁⲥϭⲓⲥⲓ ⲉ̀ⲙⲁϣⲱ :

ⲛ̀ϫⲉ ⲧⲁⲓ ⲡⲁⲣⲑⲉⲛⲟⲥ :ⲉⲑⲙⲉϩ ⲛ̀ⲧⲁⲓⲟ .

⳽Ⲇⲁⲩⲓⲇ ⲁϥⲥⲁϫⲓ ⲉⲑⲃⲏⲧⲥ : ϫⲉ ⲁ̀Ⲡϭ̅ⲥ̅ ⲥⲱⲧⲡ ⲛ̀Ⲥⲓⲱⲛ :

ⲁϥⲓ̀ ⲁϥϣⲱⲡⲓ ⲛ̀ϧⲏⲧⲥ : ϣⲁ ⲛ̀ⲧⲉϥⲥⲱϯ ⲙ̀ⲙⲟⲛ .

Ⲉⲧⲉ ⲑⲁⲓ ⲧⲉ Ⲙⲁⲣⲓⲁ̀ : ⲉⲧⲁⲥⲓ̀ⲛⲓ ϣⲁⲣⲟⲛ

ⲛ̀ϯⲉⲗⲉⲩⲑⲩⲣⲓⲁ :ⲛ̀ⲉ̀ⲱⲛⲓⲟⲛ .

Ⲍⲁⲭⲁⲣⲓⲁⲥ ⲁϥϫⲟⲥ : ϫⲉ ϯⲗⲩⲭⲛⲓⲁ̀ ⲛ̀ⲛⲟⲩⲃ :

ⲑⲏⲉⲧⲁⲩⲑⲁⲙⲓⲟⲥ :ϧⲉⲛ ϩⲁⲛϫⲓϫ ⲛ̀ⲛⲟⲩⲃ.

⳽ Ⲏⲥⲁⲏ̇ⲁⲥ ⲁϥϫⲟⲥ ⲛⲁⲛ : ϧⲉⲛ ⲟⲩⲥ̀ⲙⲏ ⲛ̀ⲑⲉⲗⲏⲗ :

ϫⲉ ⲉⲥⲉ̀ⲙⲓⲥⲓ ⲛⲁⲛ :ⲛ̀Ⲉⲙⲙⲁⲛⲟⲩⲏⲗ .

⳽ Ⲑⲁⲓ ⲧⲉ Ⲓⲉⲣⲟⲩⲥⲁⲗⲏⲙ : ⲧ̀ⲡⲟⲗⲓⲥ ⲙ̀ⲡⲉⲛⲛⲟⲩϯ :

ⲡ̀ϩⲁⲣⲙⲁ ⲛ̀ⲛⲓⲬⲉⲣⲟⲩⲃⲓⲙ :ⲉⲧⲟⲓ ⲛ̀ⲟⲩⲑⲟ ⲛ̀ⲣⲏϯ .

Ⲓⲉⲍⲉⲕⲓⲏⲗ ⲁϥⲉⲣⲙⲉⲑⲣⲉ : ⲁϥⲟⲩⲱⲛϩ ⲛⲁⲛ ⲙ̀ⲫⲁⲓ :

ϫⲉ ⲁⲓⲛⲁⲩ ⲉ̀ⲟⲩⲡⲩⲗⲏ : ⲛ̀ⲥⲁ ⲛⲓⲙⲁⲛ̀ϣⲁⲓ.

Ⲕⲩⲣⲓⲟⲥ ⲡⲓⲣⲉϥⲛⲱϩⲉⲙ : ⲁϥϣⲉ ⲉ̀ϧⲟⲩⲛ ϣⲁⲣⲟⲥ :

ⲁⲥⲟϩⲓ ⲉⲥϣⲱⲧⲉⲙ : ⲙ̀ⲡⲉⲥⲣⲏϯ ⲕⲁⲗⲱⲥ .

⳽Ⲗⲁⲟⲥ ⲛⲓⲃⲉⲛ ⲥⲉϩⲱⲥ : ⲛⲉⲙ ⲛⲓⲁⲥⲡⲓⲛ̀ⲗⲁⲥ :

ⲉ̀ϯⲐⲉⲟⲧⲟⲕⲟⲥ :ⲑ̀ⲙⲁⲩ ⲙ̀Ⲙⲁⲥⲓⲁⲥ .

⳽ Ⲙⲁⲣⲓⲁ̀ ϯⲥⲉⲙⲛⲉ : ⲡ̀ⲟⲩⲛⲟϥ ⲛ̀ⲛⲓⲇⲉⲕⲉⲟⲥ :

ⲟⲩⲟϩ ⲛ̀ⲁⲗⲏⲑⲓⲛⲏ : ⲫ̀ⲣⲁϣⲓ ⲛ̀ⲛⲓⲡⲓⲥⲧⲟⲥ .

Ⲛ̀ⲑⲟ ⲧⲉ ϯⲥ̀ⲕⲏⲛⲏ : ⲉ̀ⲧⲁ Ⲙⲱⲩ̀ⲥⲏⲥ ⲑⲁⲙⲓⲟⲥ :

ϧⲉⲛ ⲟⲩⲛⲓϣϯ ⲛ̀ⲧⲓⲙⲏ :ⲟⲩⲟϩ ⲛ̀ϯⲕⲓⲃⲱⲧⲟⲥ .

Ⲕ̀ⲥⲁⲡ̀ϣⲱⲓ (Ⲝⲁⲡ̀ϣⲱⲓ) ⲛ̀ⲛⲓⲙⲉⲩⲓ : ⲛ̀ⲉⲡⲟⲣⲁⲛⲓⲟⲛ :

ⲛ̀ϫⲉ ⲡⲁⲓϩⲱⲃ ⲛ̀ϣ̀ⲫⲏⲣⲓ : ⲛ̀ⲧⲉ ⲡⲓⲓ̀ⲗⲁⲥⲧⲏⲣⲓⲟⲛ .

⳽ Ⲟⲩⲛⲓϣϯ ⲡⲉ ⲡ̀ⲱ̀ⲟⲩ : ⲛ̀ⲧⲉ ⲧⲉⲡⲁⲣⲑⲉⲛⲓⲁ̀ :

ⲱⲑⲏⲉⲑⲙⲉϩ ⲛ̀ⲱⲟⲩ :ϯⲁⲅⲓⲁ̀ Ⲙⲁⲣⲓⲁ̀ .

⳽ Ⲡⲓⲥ̀ⲧⲁⲙⲛⲟⲥ ⲉⲧⲧⲁⲓⲏⲟⲩⲧ : ⲟⲩⲟϩ ϯⲗⲩⲝⲛⲓⲁ̀ :

ϯϣⲟⲩⲣⲏ ⲉⲧⲧⲟⲩⲃⲏⲟⲩⲧ : ⲉⲑⲙⲉϩ ⲛ̀ⲉⲩⲗⲟⲅⲓⲁ̀ .

Ⲣⲁⲛ ⲛⲓⲃⲉⲛ ⲉⲧϭⲟⲥⲓ : ⲛ̀ⲧⲉ ⲛⲓⲁⲥⲱⲙⲁⲧⲟⲥ :

ⲙ̀ⲡⲟⲩϣ̀ⲫⲟϩ ⲉ̀ⲡ̀ϭⲓⲥⲓ : ⲛ̀ⲧⲉ ⲛⲉⲙⲁⲕⲣⲓⲥⲙⲟⲥ.

Ⲥⲉⲧⲉⲛⲑⲱⲛϯ ⲉ̀ⲡⲓϣ̀ⲃⲱⲧ : ⲛ̀ⲧⲉ Ⲁ̀ⲁⲣⲱⲛ :

ⲉⲧⲁϥⲫⲓⲣⲓ ⲉ̀ⲃⲟⲗ ⲁϥⲣⲱⲧ : ⲟⲩⲟϩ ⲁϥϯⲕⲁⲣⲡⲟⲛ .

⳽ Ⲧⲉϭⲟⲥⲓ ⲉ̀ⲙⲁϣⲱ :ⲉ̀ϩⲱⲧⲉ ⲛⲓⲬⲉⲣⲟⲩⲃⲓⲙ :

ⲧⲉⲧⲁⲓⲏⲟⲩⲧ ⲛ̀ϩⲟⲩⲟ̀ : ⲉ̀ⲛⲓⲤⲉⲣⲁⲫⲓⲙ .

⳽ Ⲩⲓⲟⲥ ⲑⲉⲟⲥ ⲡⲉⲛⲛⲟⲩϯ : ⲁ̀ⲣⲉⲙⲓⲥⲓ ⲙ̀ⲙⲟϥ :

ⲧⲉⲛϯⲱ̀ⲟⲩ ⲛⲁϥ ϩⲱⲥ ⲛⲟⲩϯ : ⲟⲩⲟϩ ⲧⲉⲛⲟⲩⲱϣⲧ ⲙ̀ⲙⲟϥ .

Ⲫⲏⲉⲧϣⲟⲡ ϧⲉⲛ ⲡⲓⲟⲩⲱⲓⲛⲓ : ⲛ̀ⲁⲧϣ̀ϧⲱⲛⲧ ⲉ̀ⲣⲟϥ :

ⲁϥⲟⲩⲱⲛϩ ⲛ̀ⲛⲉϥⲙⲏⲓⲛⲓ : ⲁ̀ⲣⲉϯ ⲉ̀ⲣⲱϯ ⲉ̀ⲣⲱϥ .

Ⲭⲉⲣⲉ ⲛⲉ Ⲙⲁⲣⲓⲁ̀ : ϯϭⲣⲟⲙⲡⲓ ⲉⲑⲛⲉⲥⲱⲥ :

ⲉⲑⲙⲉϩ ⲛ̀ⲥⲟⲫⲓⲁ̀ : ⲑ̀ⲙⲁⲩ ⲛ̀Ⲓⲏ̅ⲥ̅ Ⲡⲭ̅ⲥ̅ .

⳽ Ⲯⲉⲡⲓ ⲛ̀ⲧⲉ ⲛⲉⲛⲉ̀ϩⲟⲟⲩ : ⲧⲉⲛⲉⲣⲉⲩⲫⲟⲙⲓⲛ ⲙ̀ⲙⲟ :

ⲱ ⲑⲏⲉⲑⲙⲉϩ ⲛ̀ⲱ̀ⲟⲩ : ⲧⲉϫⲟⲗϩ ⲙ̀ⲡⲓⲧⲟⲩⲃⲟ .

⳽ Ⲱ̀ⲟⲩⲛ̀ϩⲏⲧ ⲡⲓⲙⲁⲓⲣⲱⲙⲓ : ⲉ̀ϩ̀ⲣⲏⲓ ⲉ̀ϫⲉⲛ ⲡⲉⲕⲃⲱⲕ :

ⲭⲱ ⲛⲁⲛ ⲉ̀ⲃⲟⲗ ⲛ̀ⲛⲉⲛⲛⲟⲩⲃⲓ : ⲟⲩⲟϩ ϣⲟⲡⲧⲉⲛ ⲉ̀ⲣⲟⲕ