عن شهداء رشيد

بالنسبة للهري بتاع الامنجية \ الدولجية \السيساوية \ المواطنين الشرفاء بخصوص  

ليه بدل ما يدفعوا ال 30 باكو علشان يسيبوا ارض الوطن و يعدوا للناحية التانية من البحر الابيض

ما عملوش بيهم مشروع و اشتغلوا و استقروا

لاحظوا الآتي

1- مهما كان المشروع هيطلع لهم فيه أ\ حمدي من مكتب مكافحة الشباب و م \عواطتشف من مديرية الاحباط و التعقيد بمليون ورقة وختم وضرايب و جمارك و حملات تفتيش من كل ظبوط و عسكور وموظف و طبعا مليون درج مفتوح وكباية شاي بالياسمين .... الخ ده في حالة لو حبوا يمشوا قانوني
لو حبوا يشتغلوا بدون ورق هيطلع لهم تموين و غرامات و قفل و تشميع و و ... الخ
امين شرطة و لا مخبر يعدي عليهم و يقيش الي في المحل- المكان - عربية توزيع -المشروع الصغير مهما كان " في حب مصر " و يخلع
يعني ال 30 باكو ملطوش الي هم اصلا جايين سلف و دين ببساطة هيتحولوا بقدرة المذل المتكبر المقيت ل 10 بكاوي راس مال و الباقي ضاع في صحة بسطاويسي افندي

2- هم خلاص عدوا الخطوات دية نشوف الجدوي
30 باكو = 30000 \12.8 = 2343.75 USD $$ ده النهارده و بكرة هيضمحلوا اكتر و اكتر
الحد الادني للمعيشة في الولايات المتحدة 2013 هو مبلغ US$11,490 سنويا تقريبا خمس اضعاف راس ماله (رأس المال مش المكسب )
وما افتكرش مكسبه هيوصل ل 10 % الي هو أقل من معدل التضخم في مصر 12.37 % حسب البنك المركزي
هنا استعملت الولايات كمثال
في المملكة المتحدة مثل تاني £9,191 في السنة للفرد يعني تقريبا 121964.57 ج م يعني 4.065485667
اربع اضعاف راس ماله
و قيس علي كده باقي بلاد شمال البحر الابيض "ايطاليا - فرنسا - اسبانيا او حتي قبرص و اليونان "
3 -حط بقي غير الفلوس شوية حاجات كتيرة مالهاش اهمية ولا وزن و اعتبار عند الجماعة الامنجية زي
الحرية -حرية -اعتقاد- تعبير- سياسة- دينية - سلوك - غذاء - حرية جنسية - كروية - حرية تنقل -..... الخ
جودة الحياة - ثقافة - حضارة - جمال - سلوك راقي
تخلص من سيطرة تجار الدين - البعد عن الدجل و الشعوذة  - علم - فرصة حياة أفضل 
فببساطة كده هم حسبوها صح
يا يوصلوا لجنة الشط التاني من البحر يا يستريحوا من الدنيا و بلاويها