ϯⲡ̀ⲣⲟⲫⲏⲧⲓⲁ̀ ⲛ̀ⲧⲉ Ⲓⲱⲛⲁ Ⲡⲓⲕⲉⲫⲁⲗⲉⲟⲛ ⲙ̀ⲙⲁϩ ⲇ̅

ϯⲡ̀ⲣⲟⲫⲏⲧⲓⲁ̀ ⲛ̀ⲧⲉ Ⲓⲱⲛⲁ Ⲡⲓⲕⲉⲫⲁⲗⲉⲟⲛ ⲙ̀ⲙⲁϩ ⲇ̅
1 :  Ⲟⲩⲟϩ ⲁϥⲉⲣⲙ̀ⲕⲁϩⲛ̀ϩⲏⲧ ⲛ̀ϫⲉ Ⲓⲱⲛⲁ ϧⲉⲛ ⲟⲩⲛⲓϣϯ ⲛ̀ⲉⲙⲕⲁϩⲛ̀ϩⲏⲧ .
2 : Ⲟⲩⲟϩ ⲁϥⲉⲣⲡ̀ⲣⲟⲥⲉⲩⲭⲉⲥⲑⲉ  ⲉ̀ⲡ̀ϣⲱⲓ ϩⲁ Ⲡ⳪ ⲟⲩⲟϩ ⲡⲉϫⲁϥ ϫⲉ :  Ⲡ⳪ ⲙⲏ ⲛⲁⲓ ⲁⲛ ⲛⲉ ⲛⲁⲥⲁϫⲓ ⲓⲥϫⲉⲛ  ⲉⲓⲭⲏ ϧⲉⲛ ⲡⲁⲕⲁϩⲓ : ⲉⲑⲃⲉ ⲫⲁⲓ ⲁⲓⲉⲣϣⲟⲣⲡ ⲙ̀ⲫⲱⲧ ⲉⲐⲁⲣⲥⲓⲥ ϫⲉ ⲛ̀ⲑⲟⲕ ⲟⲩⲛⲁⲏⲧ ⲟⲩⲟϩ ⲛ̀ⲣⲉϥϣⲉⲛϩⲏⲧ ⲟⲩⲟϩ ⲛⲁϣⲉ ⲡⲉⲕⲛⲁⲓ  ⲟⲩⲟϩ ⲉⲕⲟⲩⲱⲙⲛ̀ϩ̀ⲑⲏⲕ ⲉ̀ϫⲉⲛ ⲛⲓⲕⲁⲕⲓⲁ̀ .
3:Ⲟⲩⲟϩ ϯⲛⲟⲩ ⲡⲁⲛⲏⲃ : ϭⲓ ⲛ̀ⲧⲁⲯⲏⲭⲏ  ⲉ̀ⲃⲟⲗ ⲙ̀ⲙⲟⲓ  ϫⲉ ⲛⲁⲛⲉⲥ ⲛⲏⲓ ⲉ̀ⲙⲟⲩ ⲉ̀ϩⲟⲧⲉ ⲉ̀ⲱⲛϧ .
4:Ⲟⲩⲟϩ ⲡⲉϫⲉ Ⲡ⳪ ⲛ̀Ⲓⲱⲛⲁ ϫⲉ ⲁⲛ ⲁⲕⲉⲣⲉⲙ̀ⲕⲁϩⲛ̀ϩⲏⲧ  ⲛ̀ⲑⲟⲕ  ⲉ̀ⲙⲁϣⲱ .
5: Ⲟⲩⲟϩ ⲁϥⲓ̀ ⲉ̀ⲃⲟⲗ ϧⲉⲛ ϯⲃⲁⲕⲓ  ⲛ̀ϫⲉ Ⲓⲱⲛⲁ  ⲟⲩⲟϩ ⲁϥϩⲉⲙⲥⲓ ⲙ̀ⲡⲉⲙ̀ⲑⲟ ⲛ̀ϯⲃⲁⲕⲓ  ⲟⲩⲟϩ ⲁϥⲑⲁⲙⲓⲟ̀ ⲛⲁϥ ⲛ̀ⲟⲩⲥ̀ⲕⲏⲛⲏ ⲙ̀ⲡⲓⲙⲁ ⲉ̀ⲧⲉ ⲙ̀ⲙⲁⲩ  ⲟⲩⲟϩ ⲁϥϩⲉⲙⲥⲓ ⲥⲁⲡⲉⲥⲏⲧ ⲙ̀ⲙⲟⲥ ϧⲉⲛ ⲟⲩϧⲏⲓⲃⲓ ϣⲁⲧⲉϥⲛⲁⲩ  ϫⲉ ⲟⲩⲡⲉⲑⲛⲁϣⲱⲡⲓ ⲛ̀ϯⲃⲁⲕⲓ .
6:Ⲟⲩⲟϩ ⲁϥⲟⲩⲁϩⲥⲁϩⲛⲓ ⲛ̀ϫⲉ Ⲡ⳪ ⲛ̀ⲟⲩϥⲉⲛⲧ  ⲛ̀ϭⲗⲟⲧ ⲟⲩⲟϩ ⲁϥⲓ̀ ⲉ̀ⲡ̀ϣⲱⲓ ⲉ̀ϫⲉⲛ  ⲧ̀ⲁ̀ⲫⲉ ⲛ̀Ⲓⲱⲛⲁ ⲉⲑⲣⲉϥϣⲱⲡⲓ ⲉⲩϧⲏⲓⲃⲓ ⲥⲁⲡ̀ϣⲱⲓ ⲛ̀ⲧⲉϥⲁ̀ⲫⲉ ⲉⲑⲣⲉϥⲉⲣϧⲏⲓⲃⲓ ⲉ̀ϫⲱϥ ⲉ̀ⲃⲟⲗϩⲁ ⲛⲉϥⲡⲉⲧϩⲱⲟⲩ ⲧⲏⲣⲟⲩ ⲟⲩⲟϩ ⲁϥⲣⲁϣⲓ ⲛ̀ϫⲉ Ⲓⲱⲛⲁ ⲉ̀ϫⲉⲛ ⲡⲓϥⲉⲛⲧ ⲛ̀ϭⲗⲟⲧ  ϧⲉⲛ ⲟⲩⲛⲓϣϯ ⲛ̀ⲣⲁϣⲓ .
7:Ⲟⲩⲟϩ ⲁϥⲟⲩⲁϩⲁⲥⲁϩⲛⲓ ⲛ̀ϫⲉ Ⲡ⳪ ⲪϮ ⲛ̀ⲟⲩϥⲉⲛⲧ ⲙ̀ⲫ̀ⲛⲁⲩ  ⲛ̀ϣⲱⲣⲡ  ⲙ̀ⲡⲉϥⲣⲁⲥϯ ⲟⲩⲟϩ ⲁϥϣⲁⲣⲓ ⲉ̀ⲡⲓϥⲉⲛⲧ ⲛ̀ϭⲗⲟⲧ  ⲟⲩⲟϩ ⲁϥϣⲱⲟⲩⲓ̀ .
8 :Ⲟⲩⲟϩ ⲁⲥϣⲱⲡⲓ ⲉϥⲛⲁϣⲁⲓ ⲥⲁⲧⲟⲧϥ ⲛ̀ϫⲉ Ⲫ̀ⲣⲏ ⲁϥⲟⲩⲁϩⲥⲁϩⲛⲓ  ⲛ̀ϫⲉ Ⲡ⳪ ⲪϮ ⲛ̀ⲟⲩⲡ̅ⲛ̅ⲁ̅ ⲛ̀ⲕⲁⲩⲥⲱⲛ ⲉⲫⲣⲟⲕϩ ⲟⲩⲟϩ  ⲁϥϩⲓⲟⲩⲓ̀ ⲛ̀ϫⲉ Ⲫ̀ⲣⲏ  ⲉ̀ϫⲉⲛ  ⲧ̀ⲁ̀ⲫⲉ ⲛ̀Ⲓⲱⲛⲁ  ⲟⲩⲟϩ ⲁϥⲉⲣⲕⲟⲩϫⲓ  ⲛ̀ϩⲏⲧ  ⲟⲩⲟϩ  ⲁϥⲟⲉⲓ̀ ⲛ̀ⲧⲉϥⲯⲏⲭⲏ ⲟⲩⲟϩ ⲡⲉϫⲁϥ ϫⲉ ⲛⲁⲛⲉⲥ ⲛⲏⲓ ⲉ̀ⲙⲟⲩ ⲉ̀ϩⲟⲧⲉ ⲉ̀ⲱⲛϧ .
9: Ⲟⲩⲟϩ ⲡⲉϫⲉ Ⲡ⳪ ⲪϮ ⲛ̀Ⲓⲱⲛⲁ ϫⲉ ⲁ̀ⲛⲁⲕⲉⲣⲉⲙⲕⲁϩⲛ̀ϩⲏⲧ  ⲛ̀ⲑⲟⲕ ⲉ̀ⲙⲁϣⲱ ⲉ̀ϫⲉⲛ  ⲡⲓϥⲉⲛⲧ ⲛ̀ϭⲗⲟⲧ  ⲟⲩⲟϩ ⲡⲉϫⲁϥ ϫⲉ ⲁⲓⲉⲣⲙ̀ⲕⲁϩⲛ̀ϩⲏⲧ ⲉ̀ⲙⲁϣⲱ ϣⲁ ⲉ̀ϧ̀ⲣⲏⲓ ⲉ̀ⲫ̀ⲙⲟⲩ .
10 : Ⲟⲩⲟϩ ⲡⲉϫⲉ Ⲡ⳪ ϫⲉ ⲛ̀ⲑⲟⲕ ⲁⲕϯⲁⲥⲟ ⲉ̀ϫⲉ ⲡⲓϥⲉⲛⲧ ⲛ̀ϭⲗⲟⲧ ⲫⲁⲓ ⲉⲧⲉ ⲙ̀ⲡⲉⲕϣⲉⲡϧⲓⲥⲓ  ⲉ̀ϫⲱϥ  ⲟⲩⲟϩ ⲙ̀ⲡⲉⲕ ϣⲁⲛⲟⲩϣϥ ⲫⲁⲓ ⲉⲧⲁϥ ϣⲱⲡⲓ ϧⲉⲛ ⲟⲩⲉ̀ϫⲱⲣϩ ⲟⲩⲟϩ ⲁϥⲧⲁⲕⲟ ϧⲉⲛ ⲟⲩⲉ̀ϫⲱⲣϩ .
11 :Ⲁⲛⲟⲕ ⲇⲉ ⲛ̀ϯⲛⲁϯⲁⲥⲟ ⲁⲛ ⲉ̀ϫⲉⲛ Ⲛⲓⲛⲉⲩⲏ ϯⲛⲓϣϯ ⲙ̀ⲃⲁⲕⲓ ⲑⲏⲉⲧⲟⲩϣⲟⲡ ⲛ̀ϧⲏⲧⲥ ⲛ̀ϫⲉ ϩⲟⲩⲟ̀ ⲉ̀ ⲙⲏⲧⲥ̀ⲛⲁⲩ  ⲛ̀ⲑ̀ⲃⲁ ⲛ̀ⲣⲱⲙⲓ ⲛⲁⲓ ⲉ̀ⲧⲉ ⲙ̀ⲡⲁⲧⲟⲩⲥⲱⲟⲩⲛ ⲧⲟⲩⲟⲩⲓⲛⲁⲙ ⲟⲩⲇⲉ ⲧⲟⲩϫⲁϭⲏ ⲛⲉⲙ ϩⲁⲛⲕⲉ ⲧⲉⲃⲛⲱⲟⲩⲓ̀ ⲉⲩⲟϣ .